«Таврида Электрик» – халықаралық электротехникалық холдинг, ол вакуумдық коммутациялық техника, 35 кВ-қа дейінгі желілер мен қосалқы станциялар үшін интеллектуалды автоматтандыру құрылғылары, қорғаныс пен автоматика алгоритмдері, сондай-ақ интеллектуалды электрмен жабдықтау жүйелерін («Цифрлық РЭС», «Цифрлық карьер») әзірлеу және өндірумен айналысады.

Қазақстанда компания екі бөлімше арқылы ұсынылған:

·    «Таврида Электрик Астана» ЖШС (2002 жылдан бастап) – жобалау (соның ішінде Smart Grid жүйелері), жабдық жеткізу, құрылыс-монтаждау және іске қосу-баптау жұмыстары, тапсырыс беруші персоналын оқыту және сервистік қызмет көрсету;

·    «Таврида Электрик» электротехникалық зауыты ЖШС (ресми ашылуы – 2024 жылғы ақпан) – Etalon (10 кВ) маркалы интеллектуалды толық жиынтықты таратқыш құрылғылар (КРУ) және 10–35 кВ вакуумдық реклоузерлерді өндіреді.

Зауытқа сапар барысында «КазЦентр ТКШ» АҚ өкілдері өндірістік учаскелермен, бірегей технологиялық процестермен, қорғаныс пен автоматика жүйелерінің бағдарламалық сынақтарымен және компания әзірлеген цифрлық сапа бақылау жүйесімен танысты.

Кездесу барысында тараптар «Энергетикалық және коммуналдық секторларды жаңғырту» Ұлттық жобасын іске асыруға «Таврида Электрик» компаниясының қатысу мүмкіндіктерін, сондай-ақ Қазақстандағы өндірісті одан әрі жергіліктендіру қадамдарын талқылады.

Келіссөздердің қорытындысы бойынша, тараптар электр энергетикалық инфрақұрылымның тиімділігі мен сенімділігін арттыруға бағытталған цифрлық технологияларды енгізу саласында ынтымақтастық пен тәжірибе алмасуға өзара мүдделілік білдірді.