Отырыс «Қазақстандық тұрғын үй-коммуналдық шаруашылығын жаңғырту және дамыту орталығы» АҚ кеңсесінде ұйымдастырылды.

Кеңесті құрудың басты мақсаты – Ұлттық жобаның ашықтығы мен тиімділігін арттыру. Отырыста «ҚазОрталық» АҚ басқарма төрағасы Нұрлан Солтамбеков пен «Бәйтерек» Ұлттық басқарушы холдингінің басқарушы директоры Әлия Мұрзагалиева ұсынған есептер қаралды. Олар жобаның техникалық және қаржылық операторлары болып табылады.

«ҚазОрталық» АҚ басшысы ЭКСЖ аясында техоператордың атқарған жұмысының негізгі қорытындыларын баяндап, сумен жабдықтау, су бұру, сондай-ақ жылу және электрмен жабдықтау жобаларын қарастыру бойынша атқарылған жұмыс туралы есеп ұсынды.

Өз кезегінде қаржылық оператор жобаларды қаржыландырудың ағымдағы нәтижелерін таныстырды. 2025 жылғы 25 қарашадағы жағдай бойынша ЭКСЖ электронды платформасында табиғи монополия субъектілерінен 63 өтінім қаралып, оның 43-і 72,2 млрд теңге сомасына мақұлданды. 20 өтінім (32 млрд теңге) қайта қарауға жіберілді немесе өтініш берушілер тарапынан кері қайтарылды.

Ұлттық жобаны іске асыру жоғары белсенділікті көрсетуде: 2025 жылғы 26 қарашадағы жағдай бойынша коммуналдық шаруашылықтың барлық секторлары бойынша 179 өтінім тіркелген. Бұл жобалардың жалпы болжамды құны – 473,9 млрд теңге.

Қоғамдық кеңес мүшелері тарифтік саясатқа жаңғыртудың әсері және жөндеу жұмыстары барысында отандық тауар өндірушілер (ОТӨ) өнімдерін басым қолдану мәселелері бойынша есептерді тыңдауға арналған сұрақтарды қалыптастырды. Сонымен қатар, Ұлттық экономика министрлігінің Табиғи монополияларды реттеу комитеті төрағасының есебін, Қазақстандық тауар өндірушілер тізілімінің және МЭКС электронды сатып алу платформасының жұмысын таныстыру жоспарлануда.

Еске сала кетейік, ОТӨ өнімдерін дамыту – тұрғын үй-коммуналдық шаруашылығы мен энергетика саласында қолданылатын материалдар мен жабдықтардың жергілікті өндірісін ынталандыратын жобаның басты талаптарының бірі.

Кеңес мүшелері бұл мәселелерді алдағы отырыстарда жан-жақты қарастыруды ұйғарды. Келесі отырыстардың бірі 2025 жылдың желтоқсан айында өтеді.